तीस

1.
माया तीसे,
तृप्त नि ह्वे सकद
अगर कै कि ह्वेगी त
वा निर्वाणे स्थिति च।

2.
तीस छ त
घर गिरस्थी च
देश समाज च
बिगैर तीसो
भजीराम हवलदार,
गाय न बच्छी
नींद आई अच्छी।

3.
आदिमों छैल
आदिमें तीस
ज्वा सींया मा बी
पुछयड़ु नि छवड़द।

4.
तीस त बुजि जान्द
पर भड़ास नि
भड़ास रेत अर पाणि मा
फर्क नि करद
अर आदिम
मृग तृष्णा मा
भटकणु रैंद
दिन रात।

5.
शरीले संवेदशीलता
ज्यू पीड़ा
मने ख्वैस
आँखा सुपन्यां
जिबड़ु स्वाद
हाथों कर्म
खुट्टों धर्म
सोब तीसा रुप।

@ बलबीर राणा अडिग