आजाद बणो कु स्वतंत्र पंछी छै वा
पंख पसारी उड़दूँ छै
खुट्टा पसारी सेंदु छै
अब ईंटों का पिंजरों मा कैद ह्वेगे
गाड़ियोंक भिभडाट मा भंगरिगे
पैंसों की हवा
नोटों कु पाणी
कख तक जेलू
कब तक रेलू
दौड़ नि रेस ह्वेगी जिंदगी
ज्योंण नि निभोंण ह्वेगी जिंदगी
कब्लाट त वे कु ज्यू कनु ह्वोलू
मन मा कांक्सा त रय्यीं ह्वेली
पर !
कैर भी क्या सक्दू
खाण से पैली नाक जू लग्दू
अब!
न थुकेन्दु न घुटेन्दु
अप्णा बारा का गारा इनि पिस्लू।
@ सर्वाधिकार सुरक्षित
सैराs पृथि गल्दार
भैर भितर चौबाटा
सौदा पत्ता कणा
गल्दारोंक फ़ौज
राजनितिक लडै
तिकड़म पिकडम बंदूक
गैल तें हल्या
चल्चलु तेल लगे
दिखाणा छन
सीधा साधा लाटोन
सौ का नोट मा
भोट दये खरीदयाली
एक घोर तीन पार्टी
हाथ कमल हाथी
दादा ब्वारी नाती
घप्रोल मच्यूं
क्वी नि कै से कम
कखि ह्विस्की कखि रम
ये दों परधान
हैक दों जिला पंचैत
विधायके डगर
छ्वाडा पढे लिखे
तिकडमें स्कुल लगीं
राजनीति सिखोल
मिसन मालदार
गल्दारक बाटा बटिन
जन सेवक तक
@ सर्वाधिकार सुरक्षित
....बलबीर राणा "अडिग"
गुठियार डोर
बल्द मर्खु
फुन्फ्यांट कनु
मनक कब्लाट
पुटुग घब्ल्याट
भूक चैन नि
डकार मनु
दुकुरताळ कनू
खडतम ताळी
गुसैं नि तेकुणी
गुस्याण नि
दिवाळ भिटकणु
क्या करे जावो
अपणु ही खोटू
दूसरों तें क्या ब्वन
कने समझाओ
पशु मन्खी
अपणी क्वोखू जन्म्युं
@ बलबीर राणा "अडिग"
