गजल : रूसाण

ज्वा द्वियाँ रुसयाँ राला त क्व मनालो,

जिंदग्या अलझ्यां धागा क्व सुलझालो। 

इनु अब्वलो, गुमसुम चुपचाप ठिक नि 

ये दुन्यांदरी ऊणि गिच्चो क्व ख्वलालो।

आजै दरार भ्वोळ ऊं खाड़ बण सकद, 

फेर वीं खाड़ उंद कैतें क्व खड़यालो।

सुद्दी यतनु को ततनु नि बणाण बल,  

भगवानों दियूँ यु रिश्ता क्व निभालो।

द्वियां अपणा मा इनि उसयाँ रैला त,

माफ कने हिगमत क्व दिखालो।

हिलांस जनु खुदेल्या जब यकुली त, 

घुघतां जनु गळज्यू सांखा क्व लगालो।

योक तम त्यार भितर योक म्यार, फेर,

यूँ तमोंsक तमासु शांत क्व करालो।

रुसाण मा माये डौर कमजोर पड़ली त,

बुढ़ापा मा गौळा क्व तरालो।

द्वियां मा एकन अगर आँखी बुजिन त,

भ्वोळ यूँ छुयूँ छिंज्याट पर क्व पछतालो।

जिंदगी कैतें मिली सदानी वास्ता अडिग,

सदीं जिंदगी ज्योण हमु तैं क्व सिखालो।

8 अगस्त 2023

✍️✍️✍️

@ बलबीर राणा 'अडिग'

गवाड़, मटई बैरासकुण्ड