नेता जी अपणा दलबल दगड़ मध्यवर्ती चुनो प्रचार मा जामणी गौं जाणा छै, जनि दलबल गौं से पैली गदना छाला पौंछि त अपणा पेड़ मीडिया दगड़ शूटिंग अर बाइट देंण लगिन।
रिपोर्टरन ब्वली नेता जी यीं गदनो पुल अर जामणी गौं विकासा बाबत आपक पार्टी क्या मेंडेट च ?
नेता, मि अपणा जामणी भै बेणियों कष्ट मा सरीक छौं, मि वैदा कर्दू यीं चुनो मा हमारी पार्टी जीती त जामणीवाला तैं सेर बणें द्यूला ।
तबारी जामणी गौं कि एक नोनी स्कूलों बस्ता पीठ धरि गदना मा लग्यूँ लखड़ा जंगार मा बड़ी कॉन्फिडेंस से इस्कोल छैं औणी। सब्योंन नोनी कॉन्फिडेंस देखी, चट कवगरुड़ जन चिपटयां फोटो खिंचण पर। अरे !! देखा ...देखा, यु च हमारा पाड़ै नोनी हिम्मत। जनि नोनी वळा छाला पौंछि नेताजिन चम्म नोनी कोळी डाळी, सब्बी कैमरा नेता तर्फां।
नेता जी, बेटी अब अग्ने त्वींतैं इनि रिस्क ल्ये इस्कोल नि औण पडलू, मि यख बड्या पुल अर सड़क बणें द्योला।
नोनी दे बड़ी स्याणी निकळी, अंकल, प्रधाना चुनो मा भी त तुमुन इनि सेल्फी ल्ये वैदा करिन पर !! चुनो बाद तुम तिमला फूल बणग्याँ। अर मथि बटिन वा तुमारू परधान हमारा लैट्रिना पैंसा जुदे खैन बल।
"छवटा गिच्चे बड़ी बात" सुणि सब हकदक !!!! नेतान झट नोनी भुयाँ धरिन अर कैमरा वळा तैं बोली बंद करा तैं कैमरा सेमरा। पर,,, तबारी तलक जु रिकॉर्ड होंण छै वा ह्वेगी छै। विरोधी पार्टी कुछ जासूसोन वीं रिकीर्डिंग तैं वैरल करि अर नेता भारी वोटों से सीं चुनो हारिन।
@ बलबीर राणा 'अड़िग'
No comments:
Post a Comment