होली गीत

 

ऐग्ये फागुण मैना रे बसंत मन मोण्यां ।
ऐग्ये धर्ती मा उलार देखा कन स्वाण्यां ।

डाळयों मा मौळयार ऐग्ये
फूलों मा फुलार छैग्ये
हैसणु बुरांस बण मा
पाखों मा खिलपत प्योंली देखा कन स्वाण्यां
ऐग्ये फागुण मैना रे बसंत मन मोण्यां।
 
खीसा उन्द गुलाल कोचिं
हथों मा पिचकारी भौरी
होळयारों डार चलग्ये
गौं ख्वाळों बजण लगिगे ढवळकी घमकोण्यां
ऐग्ये होली कु त्योवार देखा रंगमत होंण्या।
 
मुठयूं मा म्वोसु छुपै
भौजी द्यूरा लुकम लुकै
डंडयाळयों उबरा कूणा
कळपट मुखड़ी मा दांत देखा चमकोण्यां
ऐग्ये होली कु त्योवार देखा रंगमत होण्यां।
 
मुखड़यां रंगन रंगीं छां
गात लतपत भिज्यूं छां
होळयारों का गीत गुजणा
दाना सयाणा लग्यान दनकी दनकोण्यां
ऐग्ये होली कु त्योवार देखा रंगमत होण्यां।
 
ऐग्ये फागुण मैना रे बसंत मन मोण्यां
ऐग्ये धर्ती मा उलार देखा कन स्वाण्यां
ऐग्ये होली कु त्योवार देखा रंगमत होंण्या।
 
 
@ बलबीर  राणा अडिग