सुख समृद्धि बिज्वाड़

मेरु बाबाजी  अपणा
हर नयाँ साला दिन
डलदू छै
जौ बिज्वाड़
दय्बता थान मा
धर्दू छै नौं दिनों बर्त
कर्दू छै अनुष्ठान
सिंचदू छै बिज्वाड़
नौरतों तलक
ह्वे जान्दी छै
झकमकार हरियाळि
चड़ान्दू छै जौ डाळी
दय्बतौंऽका मठ मा
बिज्वाड़ बटि काटी
धर्दू छै एकपत्या
जौ कि डाळि दूर्वाआशीष
सब्यों मुंड मा
कर्दू छै कामना
गौं-ख्वाळा
बण-बूट
गाजि-पाती
दुन्यां संगसारे
सुख समृद्धी का वास्ता
अब मिन बी कोशिस करि
समाळी अर जमायी
वा बिज्वाड़ 
साल मा द्वी बार
कुछ अंखार
कुछ स्टेटस का वास्ता
अब अग्ने
भ्वोळ नयीं पीढ़ी
क्या कर्ली क्व जाण
बिज्वाड़ त बिज्वाड़ छ
बिज्वाड़ नि त डाळी नि
डाळी नि त
मनखि माणि नि।
@ बलबीर सिंह राणा 'अड़िग'