गद्दाग्वोळी

भुयाँ त रिंगरिट्वळी हुयीं
टक लगे अगास द्यखणु छौं
छुयूँ छुयूँ मा टुकु पौंछिग्यां
यूं छुयूँ मिजात बिंगणु छौं 

धुँवां रौळी मचायीं सर्रा पृथी
भैजी मुठ्ठी मुठ्योंळ उर्याणु छौं
क्व टपकाणु कख बे टपकणु
ऐरां चैतु काका तनि टपराणु छौं

अयां पोरों दां वाळा बी, छुयों ल्यैकी
तौन बी छुयूँ छुयूँ मा ही, मळकैनी
पांच साल तलक छुवीं भकौरणा रयाँ
हमुन छवीं बिंगैन वोंन छवीं क़ुर्च्यनी

भुलाs नोना भुखै पातणे रय्यां
खंतणो बिगैर नांगे नाचणे रय्यां
दिदाs नोनोsक उगत्याट् घबग्याट
सीं छुयूँ सुणी हवा मा उड़णा रय्यां

अब न पच्यैणु न उन्द उब होणु
एक गद्दाग्वोळी चिताणु छौं
कु जागे पीड़ा जिठाणु बैद हुयूँ
अपणा बल्दे जन मार सौंणु छौं

छुयों कु संगति बजार लग्यों
छुयोंक मोल भौ छुयों मा हौणु
कन लूटमार मचीं यूं छुयों की
जु पाळी बांधी वी गैना कटु हौणु

छुयूँ की बाखरी छुयूँ कचम्वळी
जब चावा तब बणावा
अंगुल्यों का टच मा सरो व्योपार
डिजिटल पुज्ये जबैर बी मनावा।

गद्दागवोळी = पेट की अवस्था जब अपच
में न नीचे होता है न ऊपर

@ बलबीर राणा 'अड़िग'