पंयांरी पराणी ह्योन्द एलो त तब क्या ह्वलु
भ्वोळ यनु बुग्याल नि मिली त तब क्या ह्वलु
यति अलगस ठिक नि जरा हथ खुट्टा हिलोवुं दों
रेस बणि दुन्यां दौड़ण पड़लो त तब क्या ह्वलु
भिंडी आदत न डाळ रंगीला बसंत नचणे की
रूड़ियों मा निभोण पड़लो त तब क्या ह्वलु
तति रंगमत न ह्वो मिळणे मिठी भौंण पुर्योंणे मा
विरह गीत गाणे नोबत एग्ये त तब क्या ह्वलु
सगोर सीख जरा छव्ट्टा/म्वटा गदरा तरणों कु
अचाणचक असाढ़े गाड़ एग्ये त तब क्या ह्वलु
अबी त चखळ/पखळ छ लेणों जोग जु लग्यों
भ्वोळ बैला/बंठर ही रैग्यां त तब क्या ह्वलु।
फिकर न कैर छवीं की, छविंल त लगणे ही छ
छुयों का चकर मा छवीं बण जैलो त तब क्या ह्वलु।
@ बलबीर राणा 'अड़िग'
No comments:
Post a Comment