लीचाड़ा

शुर्मा उबरु छै घसणी कि अब्बी जीsन बबड़ाट कन कि भातौ टेम ह्वेगी अर त्वेन रस्वाडो नि घिंसिन। तैकु वा बर्तबंद मथि जाणा बाद यी छूटलू मि जाण । बुढळी भुख्खी रै जाली पर क्या मजाल बिगैर बर्तटबन्द वळा हाथ भात खाली। नियम धर्मे पक्की, कट-कटकार।

तबि चार साले शीला नांगा खुट्टी तन-तन ऐ ब्वै घस्यां मा लिपाड़ा लगै ग्ये। जनि वा भैर ऐन बुढलिन टक टोकी हे निहोण्या छोरी ! कन निरासपंथ ह्वे त्वै, घसीं-घुसीं रस्वाडु लिचाड़ा कैरग्ये। निर्भगी जख तख आयीं जायीं दिख्येंदी, सर्रा ध्येळी इनि बुर्कदी कि जन कृष्ण कनय्या ह्वो। अर स्या अपणु बरमंड पकड़ी करांट कन लगिन, ऐरां ! बैसाखी त्येरु  भाग कख च नाति द्यखणु कु । 

दादी करांट सूणी अबोध शीला टरबर-टरबर ब्वै कु मुख छै द्यखणी। 

@ बलबीर राणा ‘अडिग’