भै का सों मैं पलायन नि कर्लु

भै का सों मैं पलायन नि कर्लु
मितें मेरा घोर मा सुरक्षित रोजगार द्या
नोकरी द्या चाकरी द्या
मेरा नोनियालों तें बड्या स्कूल द्या
गुणवत्ता वाळी शिक्षा अर
गुणवान मास्टरों की नियुक्ति द्या
दाल भात मि खले ल्येलू
समुचित कम्प्यूटर अर ई शिक्षा की व्यवस्था द्या।

भै का सों......
मेरा गों मा क्लास नाईन ऑल वेदर रोड द्या
नकली ठयकदारों अर
कमीशनख़्वर इंजीनियरों से छुटकरु द्या
हमेर ग्राम सभा मा पी एच सी द्या
बड्या डॉ अर स्टाफ द्या
स्वीली की जिंदगी द्या
घस्येरियों की सुरक्षा द्या
जोनल अर जिला हॉस्पिटल मा पूरी सुविधाएं द्या
स्पेलिस्ट डॉक्टरों की नियुक्ति द्या
स्पेशल चैकअप डॉ का घोर पर लगाम द्या
दवे भैर बटिन खरीदण से मुक्ति द्या।

भै का सों.........
गों मा स्वरोजगार परक लघु उद्योग धंधा लगा
हड़गा तोड़ी काम कर्लु मेरा हाथों मा काम द्या
खेती किसानी मा मदद द्या
गुणी बांदर सुंगरों से निजात द्या
मेरी जमीन की चकबंदी करे
मेरु अपणु  स्वाभिमान द्या

भै का सों.. ........
मैंखुणि सुशासन द्या
मूल भूत सुविधा से मेरु पहाड़ परिपूर्ण करा
सरकारी दप्तर, कोट कचेरी मा लेट लतीफी से निजात द्या
भरस्टाचारी कर्मचारी, अधिकारियों से मुक्ति द्या
सरकारी काम मा पारदर्शिता द्या
मनमाणी भाडू अर ट्रांसपोर्टरों पर लगाम द्या
दर्व्ला अधकचरा डरेबरों अर
खचाडा गाड़ियों से सुरक्षा द्या
खस्ताहाल सड़कियों से निर्भीकता द्या
प्राकृतिक आपदा फर ठोस योजना द्या

भै का सों भैजी मुख्यमनतरी जी
मि अपणा जीवन क्या
दस पीढ़ी तक कु अनुबंध कनु
मेरी संतति अपणी माटी दगड़ चिपकीं रैली
पलायन कतै नि कर्ली
ज्यादा क्या ब्वन आप खुद समझदार छां

आखिर बात पलायन रव्कणु छवटू सुझाव
मथि जत्गा मांगी कुछ नि चेणु
एक बार जनादेश निकाळी
कर सकदा त कर द्या
सब्बि मंत्री संतरी, अधिकारी
कर्नल,  जनरल, इंजीनियर
डॉक्टर, मास्टर सब्यूँ तें गों मा बसे द्या
अर यूँ का नोन्याल पहाड़ मा ही पढला समझे द्या
फिर द्याखा
कण नि ह्वलु विकास
कने नि रुकलु पलायन।

@ बलबीर राणा '"अडिग"
ग्राम पो मटई, चमोली
#पलायन_सुझाव